Hartmann; Haupt, Moriz [Hrsg.]: Erec: eine Erzählung (Leipzig: Verlag von S. Hirzel, 1871)

178

41d

und brähte den eilenden
wider ze sinem wibe
mit ganzem libe
und doch anders ungesunden,
als er in bete fanden, 5595
mit geiseln zeslagen.
dochn dorfte er nimmer niht geklagen,
sit im daz leben beliben was :
wan er diss smerzen wol genas.
als si in ane sach, 5600
beide liebe und ungemach
vuoren in ir herzen schrin,
doch si niht wol ensament sin.
als in diu guote
berunnen sach mit bluote, 5605
da erlasch ir herze von:
wan si was vil ungewon
an im der herzesere.
si het in nie mere
in solhen zühten gesehen. 5610
da bi was ir ein liep geschehen,
daz ez den sige an leide nam:
ditz was daz er hin wider kam
mit lebendigem libe.
hie verkerte sich dem wibe 5615
ir herzen trüebe,
als ein glas, der ez wol schüebe,
daz von swarzer varwe
bestrichen waere begarwe:
so diu abe kaeme, 5620
so wurde ez genaeme
und lieht daz e vinster was.