Universitätsbibliothek HeidelbergUniversitätsbibliothek Heidelberg
Metadaten

Friedländer, Ernst
Ostfriesisches Urkundenbuch (Band 1): 787 - 1470 — Emden, 1878

DOI Page / Citation link: 
https://doi.org/10.11588/diglit.1950#0405
Overview
loading ...
Facsimile
0.5
1 cm
facsimile
Scroll
OCR fulltext
384 1433.

twe de uppersten der bösen partye, namachtige beslechtede unde mechtige hovedlude. Unde synt
nu vort gereysed vor Edemborch, • anders genomed Sibetcsborgh, eyn mechtich slot, dar de cop-
man unde de gemeyne wanderende man tor zeeward van oldinges unde langen jaren bette hereto
groffliken van beschediged is. Unde se synt dem erbenanten slote so na gekomen, dat se id
mit der hulpe Godes wol wynnende werden, also dat, eft God wil, copman, schipheren unde alle
vronie lüde tor zeeward vorkerende des mögen gevrowed sin, unde ok na disser tijd van alsodaner
bösen partye behod unde umbeschediged bliven. Und dat heft unsen vrunden van Hamborg,
boven grote moye, arbeyd unde vorlust erer lüde unde uns mede, grot gheld unde gud gekosted,
alse dat wol to vornemende unde kenlik is, unde kosted noch hutesdages grot gud, darmede sik
de van Hamborg in grote last, borch unde schulde gesetted hebben, vormyddest deme ere gude
stad in ewich vorderff komen moste, wanne en unde ok uns van den steilen, uppe der trost,
hulpe unde wedderlach se dat na unseme rade unde unser hulpe gedan hebben, dar nyn hulpe
unde trostlike wedderlegginge umme en scheghe, dat sere tegen redelicheyd unde erlik old gesette
der stede were. Unde wente, leven vrunde, de van Hamborg unde wy mit anderen steden, unsen
vrunden, in desser ord 2) belegen, dar merkliken umme gesproken unde ok desse dinge dupeliken
overgeweghen hebben, so en kone wy doch nyne lympeliker unde bequemer wiise vinden, darmede
de van Hamborg, unse vrunde, unde wy komen mögen to wedderlecginge desser vorgeroreden
groten koste unde ok der, de wy in vortyden in Vreslande deden, so gi wol weten, dar wy noch
groffliken van to achter sin, danne dat men eynen punttollen upsette to Brucge in Vlandern ut
to gevende. Unde bidden ju, leven vrunde, mit vlitiger begeringe, dat gi der van Hamborg unde
unsen guden willen, vlit, koste, arbeyd unde woldat anzeen unde nnt unde profiit, alse dem ge-
meynen gude darvan gekomen is, unde geven juwen willen unde vulbord darto, dat de vorscrevene
punttollen vortghank kryghe, uppe dat de van Hamborg unde wy darvan unser groten koste
gudlik, alse wol redelik unde erlik is, wedderlach krygen mögen, und ok uppe dat, dat wy hir
unde andere stede der Henze, dar en dat geleghen is, dat gemeyne gud in synen anliegenden
noden, de williger unde vlitiger sin to beschermende. Unde wy bidden ju ok, leven vrunde, dat
gi uns desses juwen twideliken3) willen unde vulbord scriven by dessem boden, wente de punt-
tollen jo tegen dat vorejar erst tokomende moste gesad unde ordenered wesen, unde dat wy ju
hir wol hadden geesschet, darumme bodeschop to donde, so hebbe wy juwe umbeleghenheyd unde
unbeqwemicheyd darane to desser tijd overwegen unde benalen ju der van Hamborg, unse unde
anderer stede, unser nabure, begeringe unde meninge in scrift. Unde dit hebben wy den steden
in Lijfflande, unsen vrunden, ok aldus vorscreven, de dat, alse wy nicht en twivelen, wol mede
bevulborden. Sijt dem almechtigen Gode bevolen. Screven under unseme secrete, uppe des
hilligen Crutzes dage exaltacienis, anno etc. XXXIII0.

Item, leven vrunde, alse desse breeff rede was, screven uns unse vrunde van Hamborgh,
dat se mit der hulpe Godes Sybetesborch gewonnen hadden, des God gelovet sii.

Consules Lubicenses.

2) ord, ard = Land, Landart, nämlich die Städte des Lübischen Drittels, Lübeck sammt den pomroemschen
Hansen, im Gegensatze zu dem Preussischen Drittel und zu dem Livländischen Drittel, an das man sich ebenfalls
schriftlich wandte.

3) twiden, willfahren, twidelik, geneigt.
 
Annotationen